OS FOGARES VERDES DE O CARBALLIÑO VISITAN A PLANTA DE  SOGAMA

Asociación para a Defensa Ecolóxica de Galiza

A tarde do mércores nove de febreiro  veciños de O Carballiño participantes en Fogares verdes visitarán a planta de SOGAMA. A visita foi programada como parte das actividades formativas de Fogares verdes e en base ao interese mostrado por gran parte dos participantes en coñecer a planta incineradora de lixo. Coñecer o destino final dos residuos que eles mesmos depositan a diario nos contedores das rúas é o obxectivo principal da excursión á planta de Cerceda. Alén de traballar a concienciación sobre a necesidade da redución do volume de lixo producido e a importancia dunha boa separación no fogar.

 Sobre as 17.30h chegaremos á Sociedade Galega de Medio Ambiente onde nos recibirá unha educadora que guiaría o percorrido pola planta. Teremos oportunidade de coñecer os diferentes departamentos; a sección de triaxe na que mulleres separan os diferentes envases para o reciclado, os laboratorios dende onde se controlan os procesos, as caldeiras que queiman o lixo, as balsas de recepción de impropios e do contido da bolsa negra –destinados a queima e obtención de enerxía eléctrica-, etc.

A planta que xa se queda pequena para a grande cantidade de residuos que lles chegan de case toda Galicia por tren ou camión ten prevista unha ampliación e a construción de unha nova planta no sur de Galicia, aínda sen ubicación definitiva.

A cantidade de recursos naturais que se están a desbotar ou a transformar en enerxía non renovable é moito maior do que nos podemos permitir a sociedade galega. A necesidade de apostar con enerxía pola redución e a reciclaxe da materia orgánica en forma de compost (esta fracción corresponde a máis da metade en peso da bolsa do lixo) faise urxente. Un dato, na actualidade un cidadán galego produce ao día 1,2 kg de lixo.