Alternativa Galega de Esquerda advirte de que os datos do paro agochan unha estratexia de empobrecemento do emprego

• .“O Goberno está a conseguir o obxectivo da reforma laboral: poñer en nómina a explotación”, denuncia o deputado de AGE Juan Fajardo, que subliña que os parados con prestación por desemprego reciben un 13% menos que hai un ano  

Santiago de Compostela, 2 de xullo de 2014.- Ante os datos do paro rexistrado no mes de xuño publicados hoxe polo Ministerio de Empleo y Seguridad Social, Alternativa Galega de Esquerda (AGE) denuncia que as cifras veñen confirmar a estratexia de precarización do mercado laboral que impulsa o Goberno. AGE sinala que se segue a incrementar a fenda de xénero, o paro das mulleres descende menos có dos homes; e que por primeira vez na historia do país hai máis traballadores con contratos temporais (50,5%) ca indefinidos.

“Os datos non poden agochar a realidade, estamos ante contratos de miseria, ante o empobrecemento dos que topan un emprego. É un modelo para a contratación de pobres”, explica o deputado de AGE Juan Fajardo, que engade: “Estase a cambiar desemprego por salarios de miseria; emprego a conta de traballadores pobres, precariedade e indignidade laboral. O Goberno está a conseguir o obxectivo da reforma laboral: poñer en nómina a explotación”.

A baixada do paro rexistrado ten causas estacionais no conxunto do Estado, e no caso de Galiza non se repara na emigración e na cantidade de persoas que deixan de rexistrarse despois de perder a prestación. E non só segue a caer a taxa de cobertura senón que respecto a xuño de 2013 as prestacións en Galiza baixaron un 13%. Fajardo insistiu en que AGE esixirá un control estrito sobre os contratos temporais a tempo parcial que ocultan xornadas completas que non se pagan.