“LUGO DE CARA AO MIÑO” APLAUDE O INICIO DAS OBRAS DE RETIRADA DA ATAGUÍA ILEGAL DO RÍO E INSTA AO CONCELLO A DAR UN PASO MÁIS

Lugo, a 02 de novembro de 2016.- Ante o inicio das obras de retirada da ataguía ilegal executada por INCA nas Saamasas, dentro do leito fluvial do río, a plataforma “Lugo de Cara ao Miño” manifesta a súa satisfacción por que finalmente se faga xustiza e se repare a ilegalidade que durante un ano estivo sufrindo un dos espazos naturais máis protexidos e valiosos de todo o municipio. A resolución firme do Ministerio do expediente sancionador incoado en novembro do ano pasado pola Confederación Hidrográfica Miño-Silque obriga a reparar o dano exercido neste espazo natural de Rede Natura vén a dar a razón a esta plataforma que, desde a súa constitución, denunciou ante os diversos organismos administrativos e a opinión pública que este dique era ilegal por non estar contemplado no Proxecto hidroeléctrico da Fábrica da Luz, incumprir a Declaración de Impacto, e non ter a autorización previa da Confederación Hidrográfica Miño-Sil e da Dirección Xeral de Conservación da Natureza.

«Pese ás difamacións públicas, acusacións infundadas e demandas que ao longo destes case 12 meses tiveron que soportar esta plataforma e os seus membros por parte da empresa INCA por ter denunciado esta ilegalidade manifesta, “Lugo de Cara ao Miño” está convencida de que o esforzo pagou a pena e aplaude que a ataguía ilegal estea próxima a desaparecer de onde nunca debeu ser construída».

Deste a plataforma «estamos convencidos de que se non fose pola tenacidade e a resistencia que a cidadanía de Lugo demostrou a prol da defensa deste espazo natural protexido e do río, a ilegalidade xa estaría consolidade ou a ataguía seguiría aínda ocupando o leito do río Miño». Por iso, Lugo de Cara ao Miño quere agradecer o esforzo, traballo e apoio de todas aquelas persoas e colectivos que «desde o comezo confiaron e respaldaron as súas reivindicacións e priorizaron, por riba dos intereses particulares e privados, a defensa do río Miño, do espazo natural protexido e dos seus valores naturais».

«Valoramos tamén de forma positiva que o Concello de Lugo asumise o mandato do Ministerio e non puxese atrancos na resolución do problema, que poderían incrementar a afección ambiental, o risco na seguridade do río e das persoas e o importe da multa a pagar por todos os veciños e veciñas.  Sen embargo, cremos que a responsabilidade do  Concello de Lugo,como promotor deste Proxecto e como principal valedor dos nosos intereses como cidade, non remata aquí. O goberno local debe dar un paso aínda máis adiante no camiño cara a defensa dos nosos bens públicos fronte os agravios que poden seguir sufrindo a causa da explotación privada da Fábrica da Luz. No sucesivo, o Concello debe evitar que este Proxecto, a todas luces agresivo para o Miño e inviable, acabe hipotecandoo erario público de todos e todas as lucenses e sacrificando o espazo ambientalmente máis relevante de todo o municipio nos vindeiros 38 anos, período polo que lle adxudicou a INCA a explotación da fábrica da Luz». É por iso que a plataforma Lugo de Cara ao Miño insta ao Concello «a dispoñer todas as medidas xurídicas necesarias para evitar que toda a repercusión económica do dano ambiental e patrimonial creado no río recaía sobre as arcas municipais e, especialmente, que avalíe de forma inmediata e rigorosa a posible rescisión do contrato coa empresa adxudicataria INCA para recuperar, posteriormente, a concesión da Fábrica da Luz para a xestión pública municipal».

Co obxectivo de facer chegar de forma directa ao Concello de Lugo esta petición e as suas inquedanzas con respecto ao futuro do Proxecto de explotación hidroeléctrica da Fábrica da Luz, Lugo de Cara ao Miño solicitou a finais de setembro unha entrevista coa alcaldesa de Lugo, Lara Méndez, que actualmente está á agarda de ser respostada.