Andecha Astur convoca pa esti sábadu 27 d’agostu un Actu d’Homenaxe a la Declaración de Soberanía del Conseyu Soberanu, cola qu’Asturies s’independizó de la República Española.

Nel Puertu Tarna, a la 1 del meudí del sábadu 27 d’agostu, nel monolitu comemorativu de la Declaración de Soberanía, tendrá llugar el tradicional actu d’ homenaxe a la Declaración de Soberanía del Conseyu Soberanu por mor de la qu’Asturies s’independizó de la República Española, entamando un auténticu procesu revolucionariu y de reconocencia a nivel internacional que defendió heróicamente coles armes frente al exércitu franquista español y los sos alliaos alemanes.

La convocatoria, qu’añu ente añu venimos calteniendo, supó un compromisu en defensa de la memoria hestoria asturiana como ferramienta imprescindible pa tresformar la rialidá. Agora más que nunca la defensa de la identidá nacional asturiana y de los drechos colleutivos del Pueblu Asturianu ye una necesidá frente a los enfotos asimilacionistes del Estáu español y de los partíos sucursalistes afincaos n’Asturies que, seyan de drecha o izquierda, comparten un mesmu proyeutu estatalista costruyíu enriba los drechos y la voluntá de los Pueblos.