A portavoz do Grupo Socialista na Comisión de CRTVG do Parlamento de Galicia, María Quintas, denunciou  que a TVG “agocha” as imaxes de Feijóo co seu amigo narcotraficante Marcial Dorado. Quintas presentou unha pregunta oral na Comisión de Control da RTVG pola “descarada manipulación informativa” con relación a este asunto, que cualificou de “intolerable nun sistema democrático”.

A responsable socialista advertiu que o ente público realiza “manipulación informativa, ausencia de veracidade e conculcación dos dereitos dos cidadáns a ter unha información veraz nunha canle que se sostén con diñeiro público”. Denunciou que o goberno galego está a amparar “unha televisión de partido e partidaria, ao servizo do PP, que funciona como correa de transmisión do PPdeG”.

Quintas denunciou que a canle pública agochou deliberadamente as imaxes publicadas polo diario El País e replicadas por tódolos medios de comunicación de Galicia, estatais e mesmo internacionais, nas que aparecía xunto co seu amigo narcotraficante. A responsable socialista sinala que a manipulación chegou ao punto de que a revista de prensa do primeiro informativo do día obviou o diario que presentaba as imaxes, o mesmo día da súa publicación.

Pero sobre todo, preguntoulle ademais ao director xeral da CRTVG polos motivos para que a canle pública non retransmitira en directo o Pleno da comparecencia do presidente da Xunta para dar conta da súa relación co coñecido narcotraficante. Advertiu que mentres a TVG non ofrecía esta comparecencia, a web da canle pública si que ofrecía as adxudicacións que supostamente lle concedera o goberno bipartito.

Considerou inaudito, pero tamén un exemplo vergoñento de manipulación, que o mesmo día no que máis medios había acreditados no Parlamento para seguir a comparecencia de Feijoo (galegos, nacionais e ata algún internacional), “para a TVG ese pleno non merecera unha retransmisión en directo”.

Si informou no  informativo do medio día, pero con tempo xa suficiente para “manipular burdamente a información agochando opinións, seleccionando imaxes negativas e construíndo mensaxes distorsionadas dunha realidade evidente”. Ademais, o seu traballo como gabinete de comunicación da Xunta queda patenten coa “presenza omnipresente” de Feijóo, que “sempre pecha a noticia, veña ou non ao caso”, e que “ten asignado o papel de oposición e de goberno segundo conveña”.

Coacción e censura

Engadiu que mentres os seus profesionais son “coaccionados e censurados”, como ven de denunciar o Comité de Empresa, os informativos relegan as informacións negativas para o PP “a un segundo ou decimo carto plano, segundo conveña”. Puntualizou neste sentido o distinto tratamento dos casos de corrupción “dependendo de si afecta ao PP ou non”.

Explicou así que os pagos que recibiron altos cargos do PP relacionados co Caso Bárcenas, a conexión do PPdeG co financiamento ilegal do PP, a vinculación do presidente da Xunta co Pablo Crespo, ex secretario de Organización do PPdeG na cadea polo Caso Gürtel, a súa amizade co señor Rueda, ou posto que ocupaba en Portos de Galicia sendo Feijóo vicepresidente e conselleiro responsable desta entidade.

Engadiu o tratamento parcial e mesmo agochamento da amizade de Feijóo co narcotraficante Marcial Dorado, as adxudicacións ás súas empresas sendo Feijóo secretario xeral de Sanidade ou vicepresidente da Xunta presidida por Manuel Fraga.