A coordinadora de Economía da Executiva do PSdeG-PSOE, Carmen Gallego, acusou hoxe a Feijóo de ter “roto tódalas pontes” e facer que “tódolos diálogos sexan inútiles” ao anunciar o seu “pucheirazo electoral”. Gallego instou ao PP a retirar a proposta de redución de deputados, presentada para garantir un reparto mais favorable nas próximas eleccións, e recuperar así o consenso institucional.

A responsable socialista lamentou que o presidente da Xunta teña perpetrado este ataque contra a democracia e o sistema representativo galego para “tentar de gañar unhas eleccións que sabe perdidas”. Advertiu que Feijóo está a agochar así o fracaso da súa xestión nunha lexislatura na que “non pode ofrecer unha soa cifra positiva aos galegos e galegas”.

Gallego desbotou o argumento do aforro esgrimido polo PP por canto teñen rexeitado a proposta formulada por Pachi Vázquez de reducir o custe do Parlamento e multiplicar por sete o aforro supostamente proposto por Feijóo pero mantendo o número de escanos no Parlamento. Criticou que este grupo parlamentario “se deixe levar polos tertulianos da ultradereita mais rancia que habitan no seo do PP”.

Dixo que este “ataque frontal contra as regras democráticas acordadas por consenso” evidencia que Feijóo “actúa en clave de intereses persoais e do PP e non en clave de Galicia”. Engadiu que esta “dereita cavernícola que añora tempos pasados” e aproveita a crise, secundada por Feijóo, para “xogar coa democracia ao seu antollo” e responsabilizar á política e os políticos de “tódolos males do nosos sistema”.

A responsable socialista reivindicou o papel dos políticos para constituír unha sociedade mais xusta e igualitaria garantindo os dereitos das persoas, mentres a dereita “quere unha sociedade mais desigual, dividida entre pobres e ricos”. Anunciou que os socialistas galegos “traballaremos co resto das forzas políticas e coa sociedade civil para parar esta proposta de Feijóo”.

O peor presidente

A xuízo da responsable socialista, Feijóo “non é un bo xestor, é o peor presidente que tivo Galicia, que só recorta dereitos, que empobrece e endebeda a Galicia e que non pode presentar nin unha soa cifra positiva da súa xestión”. Lembrou así os datos do desemprego ou da débeda pública, que se teñen disparado dende a súa chegada á Xunta de Galicia, en 2009.

Dixo que Galicia ten hoxe 275.900 persoas desempregadas, cun incremento do paro catro veces superior ao do resto do Estado, e que aumentou en 113.200 persoas dende que goberna Feijóo. Ademais, hoxe hai 83.700 fogares con tódolos seus membros no paro, un 88 por cento mais que en 2009, facendo a Galicia “destruír emprego e dereitos a un ritmo superior que o conxunto do Estado.

Ademais, dixo, os galegos están hoxe moito mais endebedados que o día en que Feijóo tomou posesión, cunha débeda pública de 7.600 millóns de euros, o 12 por cento do PIB. Isto supuxo un incremento de 3.458 millóns de euros en só 3 anos, 6,5 veces mais que os 526 millóns que medrou na lexislatura anterior.

Advertiu que “tódalas medidas de recorte adoptadas por Feijóo nesta lexislatura fan que hoxe os galegos e galegas sexamos mais pobres e teñamos menos dereitos, cun sacrificio que tampouco serviu para mellorar a nosa economía”. Criticou que mentres o presidente da Xunta desenvolve unha axenda “tipicamente veraniega”, os socialistas “falamos dos problemas económicos e laborais dos galegos e galegas”.

Sinalou que mentres Feijóo quere desviar a atención dicindo que a xente está preocupada porque hai moitos políticos “a xente na rúa está preocupada polo seu futuro e o dos seus fillos, porque ven que as medidas que está tomando o PP non van na dirección axeitada para crear mais emprego e riqueza”.

Apuntou que “todo o mundo sabe que con recortes só hai mais paro, pobreza e desigualdade social, teñen que pagar uns medicamentos que ata agora non pagaban, por ir a unha sanidade de ricos e pobres, onde os pobres –e non só os inmigrantes- non terán dereitos”. Engadiu que “a xente na rúa está preocupada porque grazas ao PP os parados de longa duración vanse quedar o 15 de agosto sen a axuda de 400 euros”.

Presidenta do Parlamento

En resposta a preguntas dos xornalistas, a responsable socialista pediulle á presidenta do Parlamento que defenda á primeira institución representativa de Galicia en contra deste ataque perpetrado por Feijóo. Lamentou que esta “mais preocupada de xustificar o seu salario que de defender á institución que representa”, mentres, advertiu, no propio PP hai “división de opinións e malestar evidente” fronte a esta iniciativa tanto nas provincias como no seo do Grupo Parlamentario.