Despois do acto reivindicativo do sábado pasado no encoro de Caldas no que veciños de Caldas, -co apoio de ADEGA, do colectivo ecoloxista do Salnés e da Coordinadora antiencoro-, reclamaban da Administración de Augas de Galicia medidas urxentes para, -tal e como ordena a Directiva Marco da Auga-, recuperar a salubridade da auga potable e a calidade da auga do encoro e do río, membros de ADEGA e da coordinadora antiencoro manterán mañán, Xoves, día 7, á 1 do mediodía, no organismo de AUGAS DE GALICIA, unha entrevista co seu presidente, Francisco Menéndez, do que agardan coñecer as propostas do organismo ao problemas da auga potable, do río e do encoro de Caldas.

                  Por parte de ADEGA faráselle entrega dun escrito no que, despois de expoñerlle os graves efectos que, para a saúde da xente e para a saúde do río, se derivan desta masiva e reiterada proliferación de cianobacterias do xénero Microcystis, lle reiterarán que, -en aplicación do disposto na Directiva Marco da Auga, na vixente Lei de Augas e máis na mesma Declaración de Impacto Ambiental-, o abastecemento á poboación e a recuperación da calidade da auga e dos ecosistemas fluviais ten que prevalecer con absoluta prioridade sobre calquera outro uso privativo da auga.

O negocio hidroeléctrico, sexa de quen sexa, non pode nunca prevalecer por riba da saúde da xente e por riba da saúde do río e, neste sentido, solicitaranlle que se inicien os trámites para a recuperación da concesión para aproveitamento hidroeléctrico outorgada no seu día á empresa Cortizo Hidroeléctrica S.A. para que, así, poda o río fluír libremente e non se poda producir a  proliferación explosiva de cianobacterias na lámina de auga do encoro que se ven repetindo todos os veráns: é de xustiza, é de Lei e é de sentido común.