Esti sábadu 29 de xunu cúmplese’l primer aniversariu del Proyeutu Ástura. Con esti motivu organicen una folixa asturiana nel Pueblu d’Asturies, en Xixón.
Esti día coincide cola festividá de San Pedru y tienen decidío declarala “Día de Ástura”, que festexarán nos años vinientes.
La xornada, que va allugase nel tendayu del Muséu del Pueblu d’Asturies, ye un actu de reconocencia del infinitu valor de los nuesos raigaños y la nuesa cultura.
El programa d’autividaes tará configuráu per delles amueses d’artesanía, xuegos tradicionales ya instrumentos folk; actuaciones musicales y tonada; llectura de poemes escritos n’asturianu…
El día complétase cola participación de coleutivos que trabayen en pro de la defensa de la nuesa identidá.
Amás, tolos asistentes van poder tastiar sidra, bollos preñaos y empanaes, a lo llargu d’una tarde enllena d’allegría empobinada a tolos públicos.
Astur Galicia Noticias 