Despois do acto reivindicativo do sábado pasado no encoro de Caldas no que veciños de Caldas, -co apoio de ADEGA, do colectivo ecoloxista do Salnés e da Coordinadora antiencoro-, reclamaban da Administración de Augas de Galicia medidas urxentes para, -tal e como ordena a Directiva Marco da Auga-, recuperar a salubridade da auga potable e a calidade da auga do encoro e do río.

Neste senso, no día de hoxe (7 de outubro) membros de ADEGA e da coordinadora antiencoro mantivemos unha entrevista con Francisco Menéndez, Presidente de Augas de Galiza, para  coñecer as propostas do organismo ao problemas da auga potable, do río e do encoro de Caldas.

O sr. Menéndez debruzou unha serie de medidas, que suporán cuantiosos investimentos públicos e que a xuízo de ADEGA e dos afectados, non solucionarán definitivamente o problema. Propuxo realizar novas captacións de abastecemento para non depender directamente da auga do Umia; o reforzamento dos sistemas de depuración nas ETAT, a modificación da regulamentación de caudais do encoro ou outras medidas (non concretadas) para reducir os teores de fosfatos e nitratos no río, indutores da eutrofización.

Dende ADEGA, celebramos que a administración recoñeza cando menos implicitamente como reflicten estas propostas, a existencia dun grave problema de saúde pública e calidade ambiental do río.

Solicitámoslle portanto, que a administración considere como alternativa viábel a liberación do río eliminando o principal factor de degradación da calidade das súas augas: o propio encoro de A Baxe.

Queremos facer fincapé que as graves riscos para a saúde das persoas e a deterioración do río que está a provocar o encoro do Umia non poden ser asumidas polo erario público.

Neste senso, os custosos investimentos precisos para arranxar as desfeitas provocadas por esta instalación privada deberían ser asumidas pola empresa concesionaria. E se esta non pode garantir o cumprimento das condicións da concesión e da Declaración de Impacto Ambiental, entón a administración debería considerar a declarar a caducidade da concesión, obrigando á empresa a desmantelar a infraestrutura.

Casos similares teñen recentemente acontecido con instalacións hidroeléctricas como o encoro de Barbelido (Ávila), propiedade de Fenosa. A confederación do Douro vén de declarar a súa caducidade por «estar xerando un importante impacto no río». A extinción do dereito de aproveitamento implica a paralización da actividade e a reversión gratuitamente e libre de cargas das obras e das instalacións da central.

ADEGA esixe da Xunta unha sensibilidade similar para o Umia, habida conta de que o encoro d’A Baxe está a causar ademais un risco sanitario grave á poboación, alén de supoñer o principal factor de degradación do Umia. Calquera outra «solución» non rematará co problema crónico que sofre o río e só suporía investir máis cartos públicos para que a concesionaria siga espremendo o río como até o de agora.