A Universidade de Santiago celebrou este luns 4 de mayo de 2015 un emotivo acto de recoñecemento ás 45 persoas que superaron este ano as probas de acceso á Universidade para maiores de 25 e 45 anos. No Salón de Graos do Colexio de San Xerome o futuro alumnado universitario foi recibido polo reitor Juan Viaño, que cualificou de “encomiable e digno” o seu esforzo xa que “probablemente teñan que conciliar a súa vida laboral e familiar coa decisión de estudar unha carreira, cuns horarios ríxidos, pautados e cunha serie de retos que hai que ir cumprindo día a día, algo propio de persoas valentes que merecen toda a nosa axuda para lograren o obxectivo proposto”.

Nese encontro informóuselles dunha serie de servizos pensados especificamente para eles como o programa A Ponte, cuxo director é o profesor Luis Hervella, tamén presente no acto xunto con Ramón Bravo Quintás, presidente do Tribunal Único. O Programa A Ponte, organizador de actos coma o de onte, trata de orientar o futuro estudante universitario para que  poida elixir os estudos que máis se adapten ás súas preferencias.

O acto rematou coa intervención da estudante da USC Catalina Puy Fraga, que hai uns anos decidiu iniciar o grao de Comunicación Audiovisual na Universidade de Santiago. Como dixo o reitor, “Catalina é un claro exemplo do que supón asumir o reto da vida universitaria desde a perspectiva dos maiores de 25 anos”.