Compostela, 17 de xaneiro de 2013.

A sección sindical da CIG (PDI-PAS) da USC quere expresar a súa máxima preocupación e frontal rexeitamento cara ao proxecto de Lei de orzamentos da Xunta de Galicia para 2013, actualmente a debate no Parlamento.

A Xunta fai un severísimo recorte no financiamento das universidades galegas de 21,7 millóns de euros.  O financiamento estrutural, que cobre os gastos de persoal e os gastos correntes básicos das universidades, pasa de 290,06 M€ a 250,74 M€.

Unha parte substancial dos recortes previstos correspóndese cunha brutal tesoirada de 15,7 M€ da masa salarial.  Aínda que o proxecto de Lei de orzamentos establece unha redución da masa salarial para a Administración autonómica do 3,4%, a que lle aplica ao conxunto das tres universidade será dun 5%, o que resulta unha evidente penalización. Faltarían aínda con estas previsións en torno a 8,6M€, por mor das actualizacións automáticas pola antigüidade e os complementos retributivos. Tal desaxuste poderíase traducir en cerca de 250 despedimentos de PAS e PDI así como de maiores recortes salariais.

No que respecta aos fondos de I+D+i, aparenta un lixeiro aumento (de 46M€ a 48 M€), mais cómpre aclarar que nos últimos tres anos estas consignacións orzamentarias resultaron ficticias: executouse un escaso 20% das partidas, pois a Xunta non chegou a realizar a maioría das convocatorias previstas e diminuíu o alcance das poucas que se publicaron.

O goberno da Xunta pretende que sexan as taxas académicas as que compensen a baixada orzamentaria anunciada, para o cal prevén un incremento por este concepto de 6M€.  Para a CIG estas estimacións son ben pouco axustadas á realidade, e rexeitamos que se restrinxa o acceso ao ensino universitario por razóns económicas.

A CIG considera que estes orzamentos son unha sentenza de morte para as universidades públicas: conculcan o principio de autonomía universitaria e van causar unha grave degradación do servizo público de ensino superior, dificultar o acceso da sociedade á universidade e provocar despedimentos de persoal.

Facemos un chamado á comunidade universitaria para expresarmos o noso rexeitamento a estas políticas e convidámosvos, en primeiro lugar, a acudirdes ás concentracións convocadas polas organizacións sindicais con representación no sector público para hoxe, día 17 de xaneiro, nas principais cidades galegas , ás 19:00 horas, contra os recortes laborais e o deterioro dos servizos públicos.

Santiago: Praza do Toral

Lugo: Subdelegación do Goberno.

—————————————-

Concentracións nas cidades galegas o día 17, ás 19:00 horas, contra os recortes laborais e o deterioro dos servizos públicos

Hoxe xoves, ás 19:00 horas, as organizacións sindicais con representación no sector público, CIG, CCOO, UGT, CSI·F, CESM, OMEGA, SATSE, USAE, STEG, ANPE, USO, USTG, CGT, STAJ, SIAT e ACAIP, que integran a Plataforma en Defensa dos Servizos Públicos, convocan concentracións en todas as cidades galegas contra as medidas que vén de aprobar a Xunta de Galiza que empeoran as condicións laborais e salariais das empregadas/os públicos/as e deterioran, aínda máis, os servizos públicos.

As concentracións previstas son:

o A Coruña: Delegación do Goberno.

o Santiago: Praza do Toral

o Ferrol: Praza de España.

o Pontevedra: Subdelegación do Goberno.

o Vigo: Museo MARCO

o Ourense: Subdelegación do Goberno.

o Lugo: Subdelegación do Goberno.

Compostela, 17 de xaneiro de 2013.

Gabinete de Comunicación

Confederación Intersindical Galega